Gesù risorto

Ribera Corso Umberto

Il poeta Giuseppe Cannata riberese,
ha dedicato questa poesia all’incontro di Pasqua di Ribera.

Lu ‘Ncontru di Pasqua chi fa Ribera,
tradizioni di li Rivilisi,
fa ‘mmidiari tutti li paisi
pirchì è lu megliu, e porta la bannera.

La madunnuzza, ferma, addulurata,
ca persi lu so figliu Sarvaturi,
vistuta a luttu, ‘n centru di strata,
tutta chiangenti e china di duluri.

Vidi arrivari a san Micheli Arcangilu
Dicennucci: < To figliu abbriviscì >,
mentri Maria si ‘nguttava a chiàngilu,
prima e secunna vota ‘un ci cridì.

La terza vota cridì lu messaggiu,
jetta lu mantu china di scumpigliu
e parti ‘ntusiasmata di curaggiu
ad ‘abbrazzari lu pirdutu figliu.

Stu ‘Ncontru è pi daveru ‘mprissiunanti,
li carni fa arrizzari a li presenti,
vidiri ricitari a sti tri Santi,
ca sunnu morti e parinu viventi.

La Matri cu lu figliu ni s’abbrazza,
la parti è naturali e si risenti,
la genti chianci tutta nni la chiazza
pirchì ‘stu ‘Ncontru è raru e cummuventi.
                      Giuseppe Cannata